असंच काहीसं घडलं होतं... कदाचित..?
मराठी वेबसृष्टीवर खळबळ उडवून देणारी बहुचर्चित मराठी वेब सीरिज "रानबाजार" अखेर आज बघितली.राजकारण अन् राजकारणाच्या पलिकडच्या अनेक न कळू शकणाऱ्या गोष्टी अन् यात शिकार ठरत जाणारा सामान्य माणूस.
अश्या एका संवेदनशील विषयाला प्रभावीपणे मांडण्याचा प्रयत्न या वेब सीरिज माध्यमातून करण्यात आला आहे..!
वेब सीरिज मधील काही अश्लील संवाद किंवा काही ठिकाणी खूप ओव्हर झाल्यासारखे वाटते.परंतु शेवटपर्यंत ही वेब सीरिज बघत गेलं की आपल्याला सुरुवातीलाच पडत गेलेल्या एक एक प्रश्नाचे उत्तर शेवटपर्यंत मिळत जाते..!
वर संगितल्याप्रमाणे काही सीन बोल्ड काही संवाद अश्लील वाटतील त्यामुळे ट्रेलर बघूनच वेब सिरीज बघायची की नाही हे आपलं आपण ठरवावे..!
रेगे’ आणि ठाकरे’ सारखे संवेदनशील विषय प्रभावीपणे हाताळणारे दिग्दर्शक "अभिजित पानसे" या वेबसीरिजच्या रुपाने आपली नवी कलाकृती घेऊन आपल्या समोर येतात अन् त्यांनी त्यांच्या कलाकारीतून असो किंवा दिग्दर्शनातून या वेब सिरीजला अक्षरशः न्याय दिला आहे..!
मराठीतील या भव्य वेब सीरिजची निर्मिती "प्लॅनेट मराठी","अ व्हिस्टास मीडिया कॅपिटल" कंपनीने केली आहे.मराठीतील आघाडीची अभिनेत्री "तेजस्विनी पंडित" आणि सोज्वळ अभिनेत्री अशी ओळख असलेली "प्राजक्ता माळी" यांनी या वेबसीरिजमध्ये केलेलं कामसुद्धा मराठी वेब विश्र्वात प्रथमतःच इतकी टोकाची भूमिका केल्याचं पाहायला मिळते.
पॉलिटिकल क्राईम थ्रिलर असलेल्या या वेब सिरीजमध्ये अभिनेत्री "तेजस्विनी पंडित" आणि "प्राजक्ता माळी" यांच्यासह "मोहन आगाशे" आणि "सचिन खेडेकर" देखील प्रमुख भूमिकेत आहेत. सत्य घटनांच्या संदर्भांवर आधारित या वेबसिरीजमध्ये आजवर कधीही न पाहिलेले सीन्स पाहायला मिळतात..!
एका मंत्री पदाच्या दावेदार असलेल्या उमेदवाराच्या छुप्या खुनापासून वेब सिरिज सुरू होते.मग त्या खून करण्यामध्ये असलेले असंख्य अदृश्य हात,पोलीस दल तपास करत असताना पुराव्याजवळ पोहचताच त्या व्यक्तीचा मृत्यू होणं किंवा आपण एका खूप मोठ्या रॅकेट मध्ये फसलो असल्याची जाणीव होणं अन् त्यातून स्वतःच स्वतःला संपवून टाकणं..!
पोलिसांचे असंख्य पुराव्यांना,शक्यतांना हाताळून पुरावे शोधणं,पत्रकारांचे या सगळ्याकडे बारकाईने लक्ष असणं.अखेर सर्वच त्या खुनाच्या तपासापर्यंत पोहचणं.परंतु शेवटी सगळ्यांना राजकारण आड येणं अन् अनेक बेकसूरू लोकांचा त्यात जीव जाणं..!
एकूणच खूप गुंतागुंतीची वाटणारी ही वेब सिरीज जसजशी शेवटाकडे येते,तसेतसे एक-एक पदर उलगडू लागते अन् शेवट पुढे अजून काय होईल हा प्रश्न आपल्या मनाला करून संपते..!
"सस्पेन्स थ्रिलर" म्हणावी अशी ही वेब सिरीज पुढच्या भागात काय होईल याची वाट बघायला लावते,यासाठी नक्कीच तिचा पुढचा भाग लवकर यावा..!
प्राजक्ता माळी,सचिन खेडेकर,मकरंद अनासपुरे,अनंत जोग,वैभव मांगले,माधुरी पवार, उर्मिला कानिटकर,मोहन जोशी,डॉ.मोहन आगाशे,तेजस्विनी पंडित या सगळ्यांची भूमिका कमाल आहे..!
माझे सगळ्यात जास्त आवडणारे पात्र कोणते असेल तर "अभिजित पानसे" दादा यांनी साकारलेला "मोकाशी" हे,सोबतच "मकरंद अनासपुरे" यांचा पत्रकार "आप्पा दिवेकर" सुद्धा आपल्याला त्यांच्या भूमिकेशी खिळवून ठेवतो."प्राजक्ता माळी" यांनी साकारलेली वेश्या वस्तीतील "रत्नाची" भुमिकासुद्धा लक्षवेधी ठरणारी आहे..!
Bharat Sonwane.
टिप्पण्या
टिप्पणी पोस्ट करा