Messi..! 💙

Messi..! 💙

#LionelMessi ...❤️

फुटबॉल म्हंटले की माझ्यासह जगातील असंख्य चाहत्यांच्या गळ्यातले ताईत बनलेला लिओनेल मेस्सी हा खेळाडू आठवतो. फुटबॉल म्हंटले की, आपसूकच फुटबॉल=मेस्सी हे समीकरण जुळून येते.

गेल्या आठवड्यात फुटबॉल विश्वात काही घडामोडी घडल्या. मेस्सीचा अर्जेंटिनासाठी खेळण्याचा प्रवास या विश्वचषकाच्या नंतर संपुष्टात येणार असं कळलं. तितकेच वाईट आजही वाटले, जितके बार्सिलोनाकडून तो खेळत असतांना अचानक त्याला बार्सिलोना क्लब सोडावा लागला होता.

असो यशाच्या शिखरावर असताना जिथे सर्व माईलस्टोन सर केले असतात, तेव्हा कुठेतरी थांबून विसावा घ्यायला हवा असतो. ही जाणीव योग्य वेळीच झाली की ठीक असते अन् तो निर्णय योग्य वेळी घेतला की, आयुष्याला घेऊन मग आपली दमछाक होत नाही.

प्रथमतः तर दमछाक हा शब्द मेस्सीसाठी बनलेलाच नाहीये. गेली कित्येक वर्ष तो धावतोय धावतोय अन् धावतोय. पण त्याचं हे धावणे आता काही अंशी थांबणारं होतं, कमी होणारं होतं. हळू हळू तो आपली वाटचाल आता विसावा घ्यायला हवा या भावनेकडे करतो आहे. जी की सुखद शेवट देऊ करणारी ठरत आहे.

अर्जेंटीनाचा स्टार फूटबॉलपटू लिओनेल मेस्सीने स्पेनिश फुटबॉल क्लब बार्सिलोनाला काही महिन्यांपूर्वी अलविदा केले होते. तेव्हा ज्या भावना माझ्या होत्या त्याच भावना कालची मॅच बघतांना होत्या. मेस्सीने १७ वर्ष खेळत असलेला बार्सिलोना क्लब सोडण्याचा निर्णय ज्या क्षणी घेतला, त्यावेळी मेस्सीसह अवघे फुटबॉल विश्व हळहळले होते.

आता पुन्हा एकदा हे क्षण अर्जेंटीनाचे प्रतिनिधित्व करत असताना मेस्सीच्या चाहतावर्गाला काल अनुभवायला मिळाले. असंख्य अर्जेंटिना फुटबॉल टीमच्या चाहत्यावर्गाच्या गळ्यातले ताईत बनलेला मेस्सी होता.

अवघ्या अर्जेंटिना अन् अवघ्या विश्वात काल फक्त मेस्सी मेस्सी अन् मेस्सी एकच आवाज गुंजत होता. अवघ्या विश्वात त्याचा चाहतावर्ग आहे, हे प्रेम काही ठराविक खेळाडूंच्याच वाट्याला आलं आहे ज्यात अव्वलस्थानी मेस्सी आहे.

काही खेळ अन् काही खेळाडू अन् त्यांचा चाहतावर्ग हे नातं कायम आठवणीत राहील असे असते. याचे जिवंत उदाहरण आपल्याला क्रिकेटचा देव सचिन तेंडुलकर याच्या क्रिकेट विश्वातील निवृत्ती नंतर अवघ्या विश्वात बघायला मिळाले.

जेव्हा टेनिस विश्वाचा बादशाहा रॉजर फेडररने निवृत्ती घेतली तेव्हा त्याच्या चाहता वर्गाची झालेली अवस्था. मी स्वतः रॉजर फेडररचा खूप मोठा चाहता, त्यामुळे त्यावेळी झालेली अवस्था वाईट्ट होती.

बाकी कालच्या सामन्याबद्दल काय बोलावं,

आम्ही जरी मेस्सीचे, अर्जेंटिनाचे चाहते असलो तरीही काल सामन्याच्या उत्तरार्धात कुठेतरी मनात येऊन गेलं की फ्रान्स जिंकायला हवा आहे.

कारण कालचा सामना हा 'न भूतो न भविष्यती' असा झाला. एकीकडे अनुभवी मेस्सी अन् एकीकडे २३-२४ वर्ष वयाचा एमबाप्पे काय बोलावं त्याच्याबद्दल. अवघ्या चार मिनिटात निर्णायक मॅच तो पलटवतो आणि शेवटपर्यंत त्याच्या संघासमवेत त्याचा असलेला संघर्ष.

ग्रेट ग्रेट आणि ग्रेटच होतं हे सर्व खूप..!

एमबाप्पे यापूर्वीचा विश्वचषक विजेता आहे आणि कालचा त्याचा खेळ बघितला तेव्हा फक्त इतकंच वाटून गेलं. कालचा सामना अवघे विश्व फक्त मेस्सीसाठी बघत असेल, त्याचाच संघ जिंकावा असं सर्वांना वाटत असेल अन् झालंही तेच. इथून पुढे मात्र आता एमबाप्पे नावाच्या पर्वाची सुरुवात झाली आहे, ज्याचं भविष्य उज्वल आहे हे त्यानं कालच्या सामन्यात दाखवून दिले.

मेस्सी आता त्याच्या आंतरराष्ट्रीय कारकिर्दीतून आनंदाने निवृत्त झाला आहे. त्याने कोपा जिंकला आहे. अन् काल त्याच्या चाहतावर्गाच्या प्रेमालाही त्याने जिंकले आहे..!

Written by,

Bharat Sonwane .