काळदरी एक अनोखं गाव..!
औरंगाबाद म्हंटले की आपल्याला नेहमीच औरंगाबाद शहर म्हणजे महाराष्ट्राची "ऐतिहासिक राजधानी" किंवा "आॅटोमोबाईल इंडस्ट्रीयल हब सिटी" या दोन गोष्टीसाठी औरंगाबाद शहर डोळ्यासमोर येते...
एव्हाना ती या शहराची ओळखच,जी औरंगाबाद शहराच्या वैभवशाली इतिहासामुळे औरंगाबादास भेटली.एकीकडे औरंगाबाद शहरात औद्योगिक वसाहतींची नव्याने निर्मिती,शहरात विकासाच्या दृष्टीने येणारे रोजमितीला नव नवीन प्रकल्प,यामुळं औरंगाबाद शहराची "आॅटोमोबाईल इंडस्ट्रीयल हब सिटी" ही नव्याने होत चाललेली ओळख...
परंतु,या ही पुढे जावून औरंगाबाद शहराचा असो किंवा जिल्ह्याचा भौगलिकदृष्ट्या जर आपण अभ्यास केला तर विविध चकित करणाऱ्या गोष्टी आपल्याला औरंगाबाद जिल्ह्यात बघायला मिळतात...
त्यामुळे औरंगाबाद जिल्ह्याला एक वेगळी भौगोलिक ओळख प्राप्त होते तर आजच्या या लेखात अशीच एक अनोखी अन् वेगळी ओळख मी तुम्हाला सांगणार आहे.जी पुन्हा एकदा औरंगाबादला वेगळं आणि उजवे ठरवते...
आपण महाराष्ट्राच्या भूगोलात बऱ्याचवेळा "काळदरी" नावाच्या गावाचा उल्लेख ऐकला,वाचला असेलच.हे गाव का इतकं महत्वपूर्ण आहे..? किंवा का या गावामुळे औरंगाबाद जिल्ह्याची एक वेगळी ओळख निर्माण होते..? ते यासाठी की औरंगाबाद जिल्ह्याचे 'कोकण' म्हणून या गावाच्या परिसराला ओळखले
जाते.कारण कोकणाप्रमाणे इथेही काही अंशी भाताची शेती केली जाते...
जाणून घेऊया औरंगाबाद जिल्ह्यातील ' सोयगाव ' तालुक्यातील काळदरी,वेताळवाडी या दोन्ही गावांची भौगोलिक स्थिती.
सोयगाव तालुक्यातील काळदरी,वेताळवाडी हे दोन्ही तांडे अजिंठ्याच्या डोंगरकुशीत साधारणपणे पूर्ण वसले आहेत.दोन्ही तांड्यांच्या तिन्ही बाजूंनी उंच अशी डोंगरे अन् यांच्या मधोमध असलेले काळदरी,वेताळवाडी हे दोन्ही तांडे आहेत. लागून उंच उंच डोंगर असल्यामुळे कधीही डोंगराची दरड कोसळण्याची भिती असते,पावसाळ्यात ही भिती जास्तीची असते.सोबतच डोंगरात असलेलं घनदाट जंगल आणि डोंगराच्या उतराने पावसाळ्यात तिन्ही बाजूंनी येणारं पाणी,यामुळे पावसाळ्यात पुर येण्याचा धोका खूप असतो,सुदैवाने आजपर्यंत येथे दुर्घटना घडली नाही...
मात्र,अजिंठ्याच्या घाटात अधूनमधून दरड कोसळत असते,सोयगाव पासून ६० किलोमीटरवर काळदरीचा हा सोयगाव व कन्नडच्या सीमेवर वसलेला निसर्गरम्य परिसर आहे...
'काळदरी' नावाप्रमाणेच या गावात प्रकाशापेक्षा अंधार जास्त वेळ असतो आणि याच गावाची एक खासियत,वेगळेपण आहे जे या गावात गेले की आपल्याला अनुभवयाला भेटते.ही काळदरी तिन्ही बाजूंनी भल्यामोठ्या डोंगराने वेढली आहे,पूर्व,पश्चिम व दक्षिण बाजूंनी डोंगर व हवा येण्यास उत्तर बाजूचे मोकळे रान.काळदरी गावात सूर्योदय होतो सकाळी ८ वाजता आणि सूर्यास्त होतो संध्याकाळी ४ दरम्यान,हेच या गावाचं वेगळपण आणि यामुळे येथील दैनंदीन जीवनसुद्धा हळुवार अन् वेगळे आहे...
काळदरी गावाबद्दल काही विशेष माहिती...
गावातील लोकसंख्या: एकूण १८९ पुरुष:१०३ , स्त्रिया:८७.
एकूण कुटुंब:३४.
काळदरी पासून सोयगाव तालुक्याचे अंतर: ७५ किमी.
काळदरी पासून जिल्ह्याचे अंतर: १४० किमी.
काळदरी गावचे क्षेत्रफळ: ७२६.०० हेक्टर.
काळदरी गावाला: महामार्ग,जिल्हामार्ग,राज्यमार्ग नाहीये.
बँक नाही,पोस्ट ऑफिस नाही,पिनकोड नाही,दळणवळण करण्यासाठी एसटी बसची सोय नाही.
दैनिक बाजार नाही,आठवडे बाजार नाही.
सर्वात महत्त्वाचे गावात वाचनालय नाही,वर्तमान पत्र नाही.
कुठल्याही सुख सोयी नसलेले हे गाव जगापासून अलिप्त आहे,आठ तास दिवस अन् सोळा तास रात्र असलेलं हे वेगळेपण दर्शवणारे गाव...
(काळदरी गाव जसे या जगापासून विलुप्त असल्यासारखे आहे,त्याचप्रमाणे या गावाची माहितीही अशीच विलुप्त प्रकारात मोडते.
त्यामुळे बरेच लेख वाचून,इंटरनेट माध्यमातून माहिती मिळवून या गावाची ही भौगोलिक स्थिती आपल्या समोर ठेवण्याचा प्रयत्न केला आहे...)
Written by,
Bharat sonwane.
टिप्पण्या
टिप्पणी पोस्ट करा